Trekkerswee is ʼn lang, verhalende gedig waarin ʼn geïdealiseerde, eenvoudige en landelike Afrikaner-bestaan vol Calvinistiese piëteit, vryheid en nasionalisme ontwrig word deur die ontdekking van goud, die Anglo-Boereoorlog en verstedeliking.
Prof. Jacob Daniël du Toit, beter bekend as Totius (21 Februarie 1877 – 1 Julie 1953), was ’n gevierde Afrikaanse digter, predikant en hoogleraar aan die Teologiese Skool van die Gereformeerde Kerk op Potchefstroom. Hy is in 1877 in die Paarl gebore as die seun van S.J. du Toit, die vader van die Eerste Afrikaanse Taalbeweging. Totius het sy studie in Daljosafat (Hugenote-Gedenkskool), Burgersdorp en Amsterdam afgelê. Na sy terugkeer na Suid-Afrika het hy predikant van die Gereformeerde Kerk in Potchefstroom geword. Gedurende die Tweede Vryheidsoorlog was hy ’n kapelaan van die Boere. Hy het later ’n doktorsgraad in teologie aan die Vrije Universiteit Amsterdam verwerf en is aangestel as professor van die Teologiese Skool in Potchefstroom. Hy sterf in 1953 in Pretoria. Sy letterkundige nalatenskap sluit die eerste vertaling van die Bybel en die beryming van die Psalms in Afrikaans in. Onder die skuilnaam Totius het hy gedigte geskryf, meestal oor sy liefde van mens, natuur en die botsende ideologie van Britse imperialisme en Afrikanernasionalisme.
