UDokotela uBongeka BuhlebaMashasha (UMaHlengwa) Selepe wagogoda eNyuvesi yaseWitwatersrand ngo-2020, ngemva kokuthola imifundaze emibili yakwa-National Institute for Humanities and Social Sciences (NIHSS) yokuphothula iziqu zeMasters neze-PhD. Uqale ukubhala lezi zinkondlo efundisa iLinguistics eNyuvesi yaseJohannesburg. Ngesikhathi sokushicilelwa kwazo ubeseNyuvesi yaseWitwatersrand efundisa izifundo zokuhumusha nokutolika izilimi. Ngaphambi kokuba abe ngumfundisi wasenyuvesi, ubeyiSekela LoMhleli emnyangweni kaHansard Nezilimi eSishayamthetho SaseGauteng. Ngaphambi kwalokho ubesoPhikweni Lukazwelonke Lwezilimi (kwaNational Language Service), okunguphiko olungaphansi koMnyango Kazwelonke Wezemidlalo Ezobuciko Nezamasiko, olubheka izindaba eziphathelene nezilimi zaseNingizimu Afrika, esebenza ngokuqondene nolimi lwesiZulu. Usebenze nasesifundazweni saKwaZulu-Natali, emnyangweni ofanayo. Njengamanje, uDokotela uHlengwa-Selepe, ufundisa isiZulu eNyuvesi Yase-Indiana, eMelika. Uma engekho emsebenzini wakhe awuqashelwe, ufundisa abantu abangasazi isiZulu ukuba bakwazi ukusikhuluma ngenxa yothando lwakhe lolimi. Leli yiqoqo lakhe lokuqala lezinkondlo.