Nga ca kuti uli Mwina Kristu wa cine, ulingile ukwishiba ukutemwa kwa kwa Lesa ukucila mu kwelenganya fye. Abo abaishiba no kutetekela muli Yesu nga Kapususha wabo bafwile ukwishiba ukutemwa kwa kwa Lesa bwino bwino mu kulekelelwa kwabo ukwa membu ukwafikilishiwe ukupitila mu Cebo ca mbilansuma ya menshi no Mupashi. Tulingile ukuba bakatetelela ba cine ba iyi imbilansuma ya cine pa kuti twishibe ukutemwa kwa kwa Lesa mu kushika. Muli iyi mbilansuma ya cine, ukutemwa kwa kwa Lesa kulaisokolola ukwine mu cine kabili na mu kushika. Nga ca kuti tulefwaya ukwishiba Lesa ngo kutemwa, ukwishiba kwesu kufwile ukufuma mu kutemwa kwa kwa Lesa ukwa cine pali ifwe uko ukwasokololwa mu Cine ca mbilansuma ya menshi no Mupashi. Elyo fye twingatungulula bambi ku kutemwa kwa cine ukwa kwa Lesa. Umutumwa Yohane ashimiko bunte ukuti Yesu Kristu, uwaishile mu menshi, umulopa, no Mupashi wa Mushilo, ni Kapususha kabili Lesa Umwine. Apashintilila ubunte bwakwe Cine ca kulekelelwa kwa lubembu, ico icaba mu menshi, umulopa, no Mupashi wa Mushilo. Nge fyo calembwa mu Cebo ca kwa Lesa, amenshi yapilibula ulubatisho lwa kwa Yesu ulo Wene apokelele kuli Yohane Kabatisha, no mulopa upilibula ubupingushi ubo Wene apokelele pa membu shesu. Na kabili, icishininkisho ce pusukilo lyesu caba mu Mupashi wa Mushilo, amenshi, no mulopa (1Yohane 5:8). Ukupyunga kwa menshi, umulopa, no Mupashi wa Mushilo kwa kwa Lesa umo Wene apokolwelamo ababembu ku membu shabo shonse.
