!Gais van die Nama speel af teen die agtergrond van die Franse Hugenote se koms aan die Kaap en Simon van der Stel se koper-ekspedisie na Namakwaland in 1686. Frans, 'n vlugteling uit Frankryk na Holland, word deur die VOC aangestel as kartograaf. Frans en sy broer besluit om na die Kaap te versit te midde van Frans se geloofstryd en die neerhalende behandeling deur Hollanders wat die Hugenote sien as Frans-gesindtes tydens die Oorlog van Devolusie. Sy geloofstryd verdiep deurdat hy aan die Nama-Opperwese, Tsui'goab, onderwerp word en hy kom tot nuwe insigte omtrent sy God en die Namas wat hy aanvanklik as barbare beskou het. Die verhaal fokus op die Namas se helingspraktyke en gee 'n sterk agtergrond omtrent die kosinsameling en bereiding-metodes van die Namas; sowel as die inwoners van die Kaap.
